"حقنا شبكة لتصريف مياة الأمطار" .. عريضة شعبية لحملة اسكندرية مبقتش مارية

سنين الإسكندرانية غرقانين فى المطر، وسنين متعطلين عن أشغالنا بسبب المطر ، وسنين بنضحك على المحافظة اللى لسه بتنزح المطرة بالمقشات، ولما ربنا يلهمهم من عنده يبعتوا عربيات تشفط المياة اللى عملت الشوراع برك، وطبعا العربيات بتعطل الطريق أكتر ما هو متعطل.
السنين دي كلها أحنا والمحافظة عارفين أن فيه حلول لمشكلة المطرة فى الإسكندرية والحل هو أن يكون فيه شبكات لتصريف مياة الأمطار فى الشوراع، وكلنا عارفين برده – أهالي وحكومة – أن شبكات مجاري تصريف المطرة دي مفروض تعملها المحافظة بس عاملين نفسنا مش واخدين بالنا وكل واحد بيتصرف اللى قدام بيته بركة بيحط طوبتين علشان يعرف يعدي أو يحاول يشوف واسطة عند الحي علشان عربية تيجي تشفط المياة.
 
بس بعد ثورة يناير 2011 عرفنا أن حقنا فى الكرامة الإنسانية يعني أننا نمشي فى شورع مفيهاش برك مياة ونقضي مصالحنا من غير عطله، وعرفنا أن حقنا فى عدالة اجتماعية يعني أننا نعيش فى بيوتنا بشكل مناسب وملائم ويكون فيه توزيع عادل للموارد يعني طالما بندفع ضرائب ورسوم ودمغات...الخ يبقي لازم نأخد حقنا فى خدمات.
علشان كده أحنا فى حملة إسكندرية ما بقتش مارية قررنا أننا نطلب من المحافظة ورؤساء الأحياء إنشاء وتركيب شبكات مجاري لتصريف مياة الأمطار لان المحافظة والأحياء وظيفتهم أنهم يخدموا الإسكندرانية ودا بموجب القانون.
 
وأحنا بندعوك أنك تطالب معانا بشوارع مفيهاش برك مياة بسبب المطرة، وتوقع معانا على العريضة الشعبية دي، ولو المحافظة لم تستجيب هنرفع قضية نلزمهم بإنشاء شبكات تصريف مياة الأمطار.
 
للتوقيع على العريضة الشعبية، اضغط هنا
حملة "اسكندرية مبقتش مارية" هي أحد حملات الجماعة الوطنية لحقوق الانسان بالاسكندرية. للاطلاع على المزيد عن حملة "اسكندرية مبقتش مارية" و أنشطتها، اضغط هنا
 
نوع المحتوى: 
حملاتنا ومبادراتنا: 
الأقسام: